Djamars último, 1 di sèptèmber 2026, Rev. P. Marc Hooyschuur di Parokia di La Birgen di Coromoto a ofresé Santa Eukaristia na okashon di apertura di Luna Mundial di Alzheimer, pa gradisí Señor pa tur fabor ku Fundashon Alzheimer Bonaire a risibí durante su 15 aña di Sueksistensia.
Intenshon di e Santa Eukaristia aki tabata pa Señor bendishoná i duna hopi forsa na tur e personanan ku ta biba ku Alzheimer, nan famia, dunadónan di kuido i tambe tur boluntario i direktiva di e Fundashon,
P. Marc tambe a ekspresá palabranan di apresio pa e trabou ku e Fundashon i su kolaboradornan ta hasi, ku ta algu asina nesesario i importante na fabor di e personanan ku ta biba ku Alzheimer.
Pader a pone énfasis riba e importansia ku un persona ku ta biba ku Alzheimer ta keda ku su dignidat komo ser humano i yu di Dios.
Na final a hiba palabra Sra Henna Winklaar, aktual direktor di e Fundashon i kende a sigui sr Evert Piar ku tabata Presidente. A hiba palabra tambe un nieta ku a bini spesial bin biba na Boneiru pa kuida su Oma.
Tabata un selebrashon ku presensia di hopi Parokiano i mashá bunita tabata pa mira hopi famia i dunadónan di kuido ku a bin kompañá nan sernan kerí durante e Sta Eukarístia spesial aki.
Diskurso di sra HennaWinklaar.
Apertura di Luna di Demensia/Alzheimer i selebrashon di 15 aña di Fundashon Alzheimer Bonaire.
Bonochi na tur nos personanan ku ta biba ku demensia, nan famianan, nan kuidadónan, nos hobennan i nos amigunan di Fundashon Alzheimer Bonaire.
Ta un gran honor pa nos ta presente aki awe na kuminsamentu na Luna di konsientisashon di Demensia/Alzheimer. Un luna ku ta pone nos atenshon riba un tema ku ta toka hopi famia, hopi hende i di un manera òf otro, henter nos komunidat.
Pero awe tin un motibu mas pa nos ta reuní. Nos ta selebrá 15 aña di Fundashon Alzheimer Bonaire.
15 aña di trabou, di dedikashon, di reto, pero prinsipalmente 15 aña di kompromiso ku hende ku ta biba ku Demensia/Alzheimer i ku nan famia i kuidadónan.
Demensia/Alzheimer no ta solamente un diagnóstiko. E ta un proseso ku por kambia bida di un un persona i di tur esnan rondó di dje. E por trese pregunta, tristesa, insiguridat i hopi biaha un sintimentu di soledat.
Pero den tur esaki tin algu ku nos por duna: Komprenshon, Rèspèt, Amor i Sostén.
Nos no por kambia tur loke Demensia/Alzheimer ta trese, pero nos por kambia e manera kon nos ta mira i trata e persona ku ta biba ku Demensia/Alzheimer.
No ta enfermedat di e persona so. E por ta di un mama, un tata, un ruman, un esposo, un esposa, un amigu. E tin su historia, su rekuerdo, su dignidat i su balor.
P’esei, Luna di konsientisashon di Demensia/Alzheimer ta un invitashon pa nos no solamente
papia mas tokante Demensia/Alzheimer, pero tambe pa skucha mas, siña mas i komprendé mas!
Durante e 15 a ku Fundashon Alzheimer Bonaire a traha, hopi hende a kontribuí pa a hasi un diferensia.
Profesionalnan, boluntarionan, kuidadórnan, famianan, donantenan i tur esnan ku di un manera grandi òf chikitu a duna nan tempu, konosementu i kurason. .
Na boso tur, masha danki!
Boso trabou ta importante, boso presensia ta importante i boso kompromiso ta hasi diferensia den bida di hopi hende.
Laga nos sigui traha huntu pa un komunidat, kaminda hende ku Alzheimer por sinti nan mes sigur, respetá i inkluí, kaminda kuidadornan no ta sinti ku ta nan so ta karga tur kos so i kaminda papia tokante demensia no ta algu pa tin bèrgwensa di dje, sino un paso pa buska yudansa i sostén.
Awe ku nos ta habri un luna di Konsientisashon, pero tambe ku nos ta marka 15 aña di speransa perseveransia i servisio.
Laga nos sigui rekòrdá ku bèrdat! Maske e memoria di e persona por desaparesé poko poko, su dignidat semper ta keda, nunka mester desaparesé!.
Ku e spiritu aki nos ta habri Luna di Demensia/Alzheimer i nos ta selebrá ku orguyo 15 aña di Fundashon Alzheimer Bonaire.
Felis 15 aña di Fundashon Alzheimer Bonaire, laga nos sigui huntu i hasi un diferensia!
MASHÁ PABIEN !
