Pa djasabra 12 di sѐptѐmber tabatin riba programa na Villa Brisa di Bida na Kaya Elina # 8, Bario Mexico di 10.00 or te 14.00 or prueba di memoria dirigí pa spesialista di grandi Erik Musch i asisití pa algun koloboradó di kuido boluntario i tambe algun boluntario di FAB ku a sòru pa e servisio na bishitantenan. Por bisa ku asisitensia tabata rasonabel i direktiva di FAB ta satisfecho ku atrobe algun siudadano a pasa e prueba di memoria. A tene debidamente kuenta ku privasidat di bishitantenan. Direktiva ta wak bѐk riba un presensia eksistoso i tin e plan pa organisá otro prueba di memoria promé ku fin di aña. Direktiva ta masha gradesido na Dr. Musch i boluntarionan kendenan a sakrifiká nan djasabra pa realisá e aktividat akí pa nos komunidat.
Riba potrѐt miembronan di Tim di Prueba di Memoria di FAB
E programa Luna Mundial di Alzheimer ta sigui djasabra 19 di sѐptѐmber di 9.00 te 12.00 or ku un Masterclass “Brain Connections & Cognitive Wellness” pa Ariadna Nicasia, Neurodiversity Coach di Curacao ma Captain Don’s Habitat. Lamentablemente direktiva por permití solamente 100 persona, ta p’esei tin e obligashon pa registrá pues tene kuenta ku esaki. Entrada ta grátis danki na MCBB, Zorg en Welzijn Groep i FAB.
Direktiva di Fundashon Alzheimer Bonaire a kontinuá ku su programa di Luna Mundial di Alzheimer djabiѐrnѐ 11 di sѐptѐmber di 19.00 te 21.00 or na Biblioteka Públiko Boneiru ku un anochi di motivashon pa Life Coach Shantha Provence ku a guia presentenan dor di un anochi inspirativo tokante resilensia, motivashon i atenshon pa bo mes. Importante tabata ku famianan a siña e tres fasenan pa asina nan sa kon pa anda ku demensia. Partisipantenan a partisipá bon na e anochi interaktivo akí. Den e di dos seshon a parti e personanan den grupo di sinku pa interkambiá di eksperensia i pa profundisá den e informashon.
Direktiva di FAB a gradisí Biblioteka Públiko Boneiru pa e ekselente koperashon pa por a organisá dos aktividat durante e e luna akí serka nan, pero tambe partikularmente Shantha Provence pa a dirigí e anochi eksistoso den kuadro di Luna Mundial di Alzheimer.
Djamars último, 1 di sèptèmber 2026, Rev. P. Marc Hooyschuur di Parokia di La Birgen di Coromoto a ofresé Santa Eukaristia na okashon di apertura di Luna Mundial di Alzheimer, pa gradisí Señor pa tur fabor ku Fundashon Alzheimer Bonaire a risibí durante su 15 aña di Sueksistensia.
Intenshon di e Santa Eukaristia aki tabata pa Señor bendishoná i duna hopi forsa na tur e personanan ku ta biba ku Alzheimer, nan famia, dunadónan di kuido i tambe tur boluntario i direktiva di e Fundashon,
P. Marc tambe a ekspresá palabranan di apresio pa e trabou ku e Fundashon i su kolaboradornan ta hasi, ku ta algu asina nesesario i importante na fabor di e personanan ku ta biba ku Alzheimer.
Pader a pone énfasis riba e importansia ku un persona ku ta biba ku Alzheimer ta keda ku su dignidat komo ser humano i yu di Dios.
Na final a hiba palabra Sra Henna Winklaar, aktual direktor di e Fundashon i kende a sigui sr Evert Piar ku tabata Presidente. A hiba palabra tambe un nieta ku a bini spesial bin biba na Boneiru pa kuida su Oma.
Tabata un selebrashon ku presensia di hopi Parokiano i mashá bunita tabata pa mira hopi famia i dunadónan di kuido ku a bin kompañá nan sernan kerí durante e Sta Eukarístia spesial aki.
Diskurso di sra HennaWinklaar.
Apertura di Luna di Demensia/Alzheimer i selebrashon di 15 aña di Fundashon Alzheimer Bonaire.
Bonochi na tur nos personanan ku ta biba ku demensia, nan famianan, nan kuidadónan, nos hobennan i nos amigunan di Fundashon Alzheimer Bonaire.
Ta un gran honor pa nos ta presente aki awe na kuminsamentu na Luna di konsientisashon di Demensia/Alzheimer. Un luna ku ta pone nos atenshon riba un tema ku ta toka hopi famia, hopi hende i di un manera òf otro, henter nos komunidat.
Pero awe tin un motibu mas pa nos ta reuní. Nos ta selebrá 15 aña di Fundashon Alzheimer Bonaire.
15 aña di trabou, di dedikashon, di reto, pero prinsipalmente 15 aña di kompromiso ku hende ku ta biba ku Demensia/Alzheimer i ku nan famia i kuidadónan.
Demensia/Alzheimer no ta solamente un diagnóstiko. E ta un proseso ku por kambia bida di un un persona i di tur esnan rondó di dje. E por trese pregunta, tristesa, insiguridat i hopi biaha un sintimentu di soledat.
Pero den tur esaki tin algu ku nos por duna: Komprenshon, Rèspèt, Amor i Sostén.
Nos no por kambia tur loke Demensia/Alzheimer ta trese, pero nos por kambia e manera kon nos ta mira i trata e persona ku ta biba ku Demensia/Alzheimer.
No ta enfermedat di e persona so. E por ta di un mama, un tata, un ruman, un esposo, un esposa, un amigu. E tin su historia, su rekuerdo, su dignidat i su balor.
P’esei, Luna di konsientisashon di Demensia/Alzheimer ta un invitashon pa nos no solamente
papia mas tokante Demensia/Alzheimer, pero tambe pa skucha mas, siña mas i komprendé mas!
Durante e 15 a ku Fundashon Alzheimer Bonaire a traha, hopi hende a kontribuí pa a hasi un diferensia.
Profesionalnan, boluntarionan, kuidadórnan, famianan, donantenan i tur esnan ku di un manera grandi òf chikitu a duna nan tempu, konosementu i kurason. .
Na boso tur, masha danki!
Boso trabou ta importante, boso presensia ta importante i boso kompromiso ta hasi diferensia den bida di hopi hende.
Laga nos sigui traha huntu pa un komunidat, kaminda hende ku Alzheimer por sinti nan mes sigur, respetá i inkluí, kaminda kuidadornan no ta sinti ku ta nan so ta karga tur kos so i kaminda papia tokante demensia no ta algu pa tin bèrgwensa di dje, sino un paso pa buska yudansa i sostén.
Awe ku nos ta habri un luna di Konsientisashon, pero tambe ku nos ta marka 15 aña di speransa perseveransia i servisio.
Laga nos sigui rekòrdá ku bèrdat! Maske e memoria di e persona por desaparesé poko poko, su dignidat semper ta keda, nunka mester desaparesé!.
Ku e spiritu aki nos ta habri Luna di Demensia/Alzheimer i nos ta selebrá ku orguyo 15 aña di Fundashon Alzheimer Bonaire.
Felis 15 aña di Fundashon Alzheimer Bonaire, laga nos sigui huntu i hasi un diferensia!
MASHÁ PABIEN !
Komo parti di su programa pa Luna Mundial di Alzheimer, sѐptѐmber direktiva di Fundashon Alzheimer Bonaire a tene djárason mainta di 10.00 pa 12.00 or na Sentro di Bario Nikiboko un enkuentro informativo tokante demensia i kon rekonosé e señalnan di demensia pa e Grupo di Enkuentro di Grandinan di Sentro AKSESO Boneiru.
Tabata un enkuentro interaktivo, kaminda e grandinan a hasi hopi pregunta i a partisipá aktivamente na e tema.
E enkuentro tabata na enkargo di Sra. Marije Veenstra, sikólogo pa grandi, asesorá pa Sra. Henna Winklaar direktor di Fundashon Alzheimer Bonaire, di profeshon Casemanager demensia. Presentenan a keda masha agradesido pa e oportunidat i direktiva di FAB ta kontinuá ku su programa di luna ku aktividatnan sumamente interesante.
Ku orguyo Fundashon Alzheimer Bonaire ta anunsiá lantamentu ofisial di Stichting Clini Clowns Bonaire. Ku masha orguyo komo ku FAB tabata inisiadó di e proyekto akí i ta tambe esun ku a kana e kaminda i a hasi e preparashonnan pa yega na e fundashon.
Esaki FAB no por a logra sin koperashon di e sostenedónan di e inisiativa ku ta Fundashon Mariadal, Zorg en Welzijn Groep, FKPD i tambe Stichting Clini Clowns Curaçao.
Ta for di komienso di aña pasá na februari a kuminsá ku e preparashonnan i a tene vários reunion ku inisiadónan, tambe ku potensial kandidatonan pa direktiva. Stichting Clini Clowns Curaçao ademas a sostené Boneiru den formulashon di statuto, proposishon di treinen i deskripshon di funshon pa prospekto cliniclownnan.
Djaweps 9 di yüli 2026 a kosechá fruta di tur e esfuersonan akí ora ku direktiva nobo di Stichting Clini Clowns Bonaire a firma akta di lantamentu serka notario.
E direktiva ta konsistí di Shanine Cicilia komo presidente, Senaida Hart visepresidente, Milena Cicilia tesorero, Zurishaddai Tremus sekretario i Marciano Silberie komo miembro di direktiva.
FAB ta deseá e direktiva nobo tur klase di éksito i ku despues di inskripshon na Kámara di Komèrsio nan sa di trese un era nobo riba tereno di kuido pa grandi i chikí na Boneiru.
Riba e potrѐt sintá e direktiva i pará e notario ku presidente di konseho di supervishon di FAB.
