Djadumingu 21 di sѐptѐmber pa 19.00 or riba Dia Mundial di Alzheimer, direktiva di Fundashon Alzheimer Bonaire (FAB) tabatin su aktividat den kuadro di Luna Mundial di Alzheimer, spesial pa kuidadónan informal i formal i famianan di personanan ku ta biba ku demensia, un anochi di alabansa titulá “Dios ta mi forsa pa sigui”. E aktividat akí tabata grátis i a tuma lugá den Corallium Hotel and Villas, konforme programa di FAB.
Den un sala bunita dekorá algun kantante lokal i Koor Coromoto a trese nan kanto komo aporte na FAB i su invitadonan.
Públiko tabata konsistí di personanan ku ta biba ku demensia, kuidadónan informal, profesionalnan di kuido, spesialistanan i miembronan di famia i tur a gosa intensamente di un bunita anochi.
Direktiva ta wak bѐk riba un anochi eksitoso unda invitadonan a gosa di músika, di kanto i di e ambiente den sala. Presidente Sr. Evert Piar a gradisí e boluntarionan ku a organisá e anochi bou di guia di vise-presidente Sra. Henna Winklaar, i tambe nos artistanan lokal kendenan a aktua gratuitamente pa e meta akí.
Mas aleu presidente a rekordá presentenan ku ainda tin dos aktividat riba programa pa klousurá Luna Mundial di Alzheimer, djasabra awor 27 di sѐptѐmber di 9.00 pa 15.00 or na Kas Karkó Playa tin posibilidat pa hasi Tѐst di Memoria. E tѐst ta grátis i no tin nodi di traha sita. Djadumingu 28 di sѐptѐmber pa 6.00 or tin e 5 km Alzheimer Awareness Walk ku ta kuminsá na Cargill Salt Co, direkshon pa e kasitanan di katibu i bѐk.
