Direktiva di Fundashon Alzheimer Bonaire ta wak bѐk riba un eksitoso simposio “Samen naar een dementievriendelijk Bonaire “ riba djasabra i djadumingu 20 i 21 di yanüari na Courtyard by Marriott.
Diputado Nina Francees-den Heyer a habri e simposio ku un bunita spich den kua el a konta un storia personal i a ekspresá su gran apresio pa tur e trabou i esfuersonan ku FAB ta ehersé pa pone e tópiko Demensia riba agѐnda.

World Alzheimer Report 2023 ku a sali na sѐptѐmber último a move FAB i hopi otro pa tuma inisiativa pa organisá e simposio akí, ku e meta prinsipal pa pidi atenshon pa e oumento drástiko di e kantidat di hende ku demensia. Rònt mundu i na Boneiru tambe komunidat ta sigui bira mas bieu. Prof. Dr. Jos Schols di Universidat di Maastricht a konmové presentenan ku su presentashon inspirativo ” Op weg naar een toekomstbestendige ouderenzorg, die ook inclusief is voor mensen met dementie” djasabra mainta. Otro oradónan tambe tabata notabel.

Direktiva di FAB asistí pa su Komishon Organisadó i Innatus B.V. a invitá sinku oradó for di Hulanda i 6 oradó for di Hulanda Karibense. Den nan tabatin profeshonal den enseñansa superior di Universidat di Maastricht i Radboud, Hogeschool Windesheim, Alzheimer Centrum Limburg i Alzheimer Nederland pa huntu kompartí konosementu, siensa i eksperensia na fabor di e lucha komun kontra demensia . Tabata tambe un bunita oportunidat pa huntu yega na konklushon kon FAB huntu ku gobiѐrnu lokal i nashonal i partnernan den kadena, lo realisá un Boneiru amabel pa demensia.

Tur esaki no tabata posibel sin nos partnernan ku a hasi esaki finansieramente posibel, Entidat Públiko Boneiru, Alzheimer Nederland, Maduro & Curiels’ Bank (Bonaire ) N.V., Stichting Cocari ll , Fundashon Wega di Number Bonaire i otronan, pa kua direktiva di FAB ta masha gradisidu .

Partisipantenan manera spesialista, dòkter, profesional den kuido, kuidadó kaloroso i miembro di famia di hende ku demensia for di Aruba, Boneiru , Curaçao, Saba, St Eustatius i Hulanda, e 2 dianan akí a yena dos sala di Courtyard by Marriott i a gosa visibelmente di un simposio edukativo i fruktífero. Direktiva, organisadónan i partnernan ta sumamente orguyoso ku e simposio tabata eksitoso i ta sigui ku forsa uní pa hasi esfuerso pa un komunidat amabel pa demensia na Boneiru. Riba e potrѐt partisipantenan despues di e promé dia di e simposio na entrada di Courtyard by Marriott.

 

Related Posts