Day: July 11, 2023

Komo klousura di treinen i aktividat di Veder Methode a sertifiká 10 kolaboradó den kuido di 5 instansia di kuido na Boneiru den Veder Methode, djabièrnè anochi na Captain Don’s Habitat. E treinen akí a kuminsá djárason 17 di mei último, bou di guia di Sra. Maria Reina Westra, direktor general di Theater Veder Methode Nederland.

E trayekto a konsistí di 4 treinen i 4 coaching, Fundashon Alzheimer Bonaire i Theater Veder a kolaborá di aserka pa realisá esaki i ta eksepshonalmente kontentu ku resultado atkerí. “Bon, kla, edukativo i interesante” segun un di e partisipantenan tokante e proyekto kompleto.

Direktiva di Fundashon Alzheimer Bonaire ta spera ku organisashon di esaki, e kolaboradónan den kuido akí lo ta kapas pa ofresé kuido kualitativo pa mehorá kalidat di bida di esnan ku ta pidi kuido na Boneiru. Pa Boneiru e kurso akí ta inovativo i Boneiru tin awor 16 kolaboradó den kuido ku ta sertifiká den Veder Methode. Ta un lástima ku 5 partisipante no a partisipá na e prueba pa motibu di malesa i nan a risibí un deelcertificaat. Direktiva ta spera mashá ku den futuro personanan ku ta biba ku demensia lo tin benefisio di Veder Methode.

Fundashon Alzheimer Bonaire ker a gradisí spesialmente e siguiente empresanan di kurason pa nan kontribushon,sino nos no por a realisá e proyekto akí; Black Durgon, Captain Don’s Habitat, Rum Runners, FuHiKuBo i Everts Carrental.

Riba e potrèt por mira partisipantenan ku nan sertifikado huntu ku Sra. Westra i miembronan di direktiva di Fundashon Alzheimer Bonaire.

Fundashon Alzheimer Bonaire komo kordinadó insular pa Boneiru a kuminsá un koperashon ku Maastricht University ‘Academisch Werkplaats Ouderenzorg’ Limburg pa un proyekto yamá DEDICATED (Desired Dementia Care Towards End of Life). Esaki ta un proyekto di inbestigashon di Hulanda dirigí riba mehorashon di kuido paliativo pa hende ku demensia.

Ta duna kuido paliativo na hende ku un afekshon inkurabel manera demensia. Ophetivo di e kuido akí ta pa mehorá kalidat di bida den e último fase di bida tambe. Diferente organisashon di kuido di islanan ABC ta tuma parti i ta traha na mehorashon di kuido paliativo pa hende ku demensia. E proyekto DEDICATED islanan ABC por yuda ku esaki.

Djárason último pa 9:30 den sala di reunion di Zorg en Welzijn Groep aki na Boneiru a start e promé treinen online di Embahador DEDICATED ku partisipashon di 3 kandidato pa Boneiru pero tambe ku partisipantenan di Kòrsou i Aruba. E partisipantenan ta representá Fundashon Mariadal/Kas di Kuido, Kas di Flamboyan Hospice i FAB. E di dos online ta sigui djaweps 3 di ougùstùs 2023 siguí pa treinen den novèmber pa e treinernan ku presensia físiko di e DEDICATED tim di Hulanda.

Direktiva di Fundashon Alzheimer Bonaire ta partikularmente orguyoso i satisfecho di por ofresé mas inovashon den kuido i duna nos kolaboradónan den kuido na Boneiru  e oportunidat pa haña konosementu i kompetensia pa asina nan ta kapas pa duna kuido kualitativo pa mehorá kalidat di bida di esnan ku ta pidi kuido.

Riba e potrèt por mira e partisipantenan durante e treinen online djárason mainta.